| Medicina Interna | Sogami | Galicia Clínica. Revista Oficial da SOGAMI |
|
Director: Ramón Rabuñal Rey Directores adxuntos: José Luís Díaz Díaz e Rafael Monte Secades Historia e antecedentes de Galicia Clínica Fundada en 1929 polo Dr. Aurelio Gutiérrez Moyano, a revista Galicia Clínica, constituíu un órgano científico rapidamente acreditado pola calidade dos traballos publicados. Personalidades como Hernando, Marañón, Pedro-Pons, Bañuelos, Rof-Carballo, Egas-Moniz, entre outros, colaboraron nos primeiros anos de edición. O seu carácter multidisciplinar converteu as súas páxinas nun foro aberto ás diferentes especialidades clínicas e aos médicos tanto galegos como foráneos. O Dr. Aurelio Gutiérrez Moyano dirixiu a revista durante 41 anos, ata o seu falecemento en febreiro de 1971, editándose sen interrupción incluso durante períodos tan dramáticos como o da Guerra Civil Española. Nesta época a revista afianzouse entre os médicos galegos, e incluso mantivo presenza en Iberoamérica. Posteriormente, o seu fillo, Luís Gutiérrez Moyano, continuou a súa labor mantendo a revista ata o seu falecemento. Nos últimos anos, por diversas causas, a revista declinou lentamente, publicándose o derradeiro número en 1996. A revista, que chegou a decana española da prensa médica, foi a máis prestixiosa referencia da Medicina Galega durante 65 anos. Nova etapa de Galicia Clínica A SOGAMI, que tivo ao longo da súa historia unha estreita relación coa revista, sendo con frecuencia o soporte das súas publicacións, non dubidou en recuperala. Grazas á xenerosidade dos herdeiros do fundador, Dr. Aurelio Gutiérrez Moyano, a cabeceira rexistrouse como Revista Oficial da SOGAMI en 2007. Neste acordo inclúese tamén a cesión de todo o fondo editorial. Desde que, no 2007, a SOGAMI adquiriu a cabeceira da revista, tense deseñado unha ampla remodelación na súa estrutura e presentación. Ademais incluíronse novas seccións co fin de adaptala aos novos tempos e facilitar o seu manexo por parte dos usuarios. Unha das novidades máis destacables e o acceso a través da web. A SOGAMI asumiu o reto de conservar todo o fondo editorial da revista, desde o primeiro número publicado en 1929, nun arquivo dixital de acceso baldío que permita a todos achegarse aos seus contidos. O primeiro número conta cunha tirada especial de 3000 exemplares, ademais da distribución habitual, entregarase aos participantes do XXIX Congreso da Sociedade Española de Medicina Interna, que se celebrará na Coruña en novembro. Aínda que neste período, Galicia Clínica é a Revista Oficial da SOGAMI, queremos manter ese carácter aberto que xa se reflicte na composición dos Comités Editorial e Científico así como na política de colaboración con autores de diferentes especialidades e doutras comunidades autónomas. Aumenta o número de colaboradores e as normas de publicación baséanse en facer das páxinas da revista un foro aberto para todos os profesionais da medicina, con especial atención aos problemas prevalentes no noso territorio, Galicia. Outros datos: distribución en papel e versión dixital A publicación continuará alí onde se deixou, polo cal manterase a numeración correlativa, correspondendo este número 1 ao volume 69. Publicarase simultaneamente en papel e en edición dixital, www.galiciaclinica.info, para aumentar a súa difusión a través da rede. Características da publicación Revista de balde Periodicidade: trimestral Tirada: 1000 exemplares, 3000 para o primeiro número Dimensións: Tamaño A-4 Impresión: 2 tintas , interior |cor, cubertas e publicidade Idioma: galego, castelán, inglés e portugués Ámbito territorial: Galicia e norte de Portugal Páxinas: 48 interiores máis cubertas Encadernación: Grampada
|